Seanca për rrëzimin e Qeverisë Kurti të shtunën? Cilat parti po e mbështesin mocionin e LDK-së

Derisa seanca për rrëzimin e Qeverisë së Albin Kurtit është raportuar se mund të mbahet të shtunën, partitë politike, Aleanca për Ardhmërinë e Kosovës, Nisma Socialdemokrate, Aleanca Kosova e Re janë shprehur se do ta mbështesin mocionin e Lidhjes Demokratike të Kosovës, ndërkaq Partia Demokratike e Kosovës është shprehur se po e shikon me vëmendje situatën dhe do të dalë me një qëndrim konkret.

Lideri i Lidhjes Demokratike të Kosovës, Isa Mustafa ka takuar të enjten krerët e disa partive politike për të marr mbështetjen për mocionin që ka nisur për rrëzimin e Qeverisë Kurti, pjesë e së cilës ishte.

Çështja e taksës dhe shkarkimi i ministrit të LDK-së, Agim Veliu u bën shkas që raportet LVV-LDK të shkojnë drejt fundit dhe të prishet koalicioni qeverisës.

Të enjten Partia Demokratike e Kosovës theksoi se po shikon me vëmendje situatën dhe do të dal me një qëndrim konkret sa i përket mocionit të votëbesimit të qeverisë Kurti të cilin e ka iniciuar Lidhja Demokratike e Kosovës.


Zëdhënësi i PDK-së, Avni Bytyçi, ka thënë se qeveria Kurti ka zgjedhur momentin më të keq për të shkaktuar këtë krizë politike.

Ndërkaq, pas takimit ndërmjet Mustafës dhe kryetarit të AAK-së, Ramush Haradinaj, ky i fundit tha se mbështesin mocionin e LDK-së për rrëzimin e Qeverisë Kurti.

“Temë diskutimi ishte inicimi i mocionit për shkarkim të Qeverisë Kurti. Në bisedim me Isa Mustafën  e njoftova se qëndrimi i AAK-së, është pro, ne e përkrahim”, tha Haradinaj para mediave.

Lideri i AAK-së, tha se është mirë të ndërmerren veprime dhe të krijohet Qeveria e re, duke shtuar më tej se me Mustafën do të takohet sërish.

Kryetari i Nismës Socialdemokrate, Fatmir Limaj ka thënë se partia e tij e mbështet mocionin e Lidhjes Demokratike të Kosovës, ndërkaq sipas tij, nuk është e domosdoshme vendi të shkojë në zgjedhje.

Limaj këto komente i bëri pas takimit me liderin e LDK-së, Isa Mustafa.

“Ne e mbështesim këtë mocion dhe jemi të gatshëm me i dhënë nënshkrimet. Duhet të kemi një qeverisje, nuk është e domosdoshme vendi me shku në zgjedhje”, tha Limaj.

Se a do të përfshihej Nisma në një qeveri gjithëpërfshirëse, ai tha “Ne nuk mund të flasim në mënyrë hipotetike…Pas mocionit me kohë do t’iu informojmë për vendimet tona”.

Ndërkaq, edhe Aleanca Kosova e Re ka bërë të ditur se do të mbështesë mocionin e nisur nga Lidhja Demokratike e Kosovës për rrëzimin e Qeverisë Kurti. /Telegrafi

Ardiana K

Read Previous

SOT PRITET KTHIMI I ORGANIZUAR I 180 QYTETARËVE NGA GJERMANIA

Read Next

EURODEPUTETJA GJERMANE KA NJË THIRRJE PËR LDK-NË