Hoti kërkon nga Kuvendi të trajtojë me prioritet Projektligjin për Buxhetin 2020

Kryeministri i Kosovës, Avdullah Hoti, ka kërkuar që Kuvendi i Kosovës të trajtojë me prioritet Projektligjin për plotësim-ndryshimin e Buxhetit 2020 dhe ri-procedimin për ratifikim të marrëveshjeve ndërkombëtare. Sipas tij, këto do t’i hapnin rrugë masave të menjëhershme për të ndihmuar qytetarët dhe bizneset.

Në një postim në Facebook, Hoti ka thënë se bizneset e goditura nga pandemia varen nga një mjedis ekonomik favorizues.

“Bizneset e vogla dhe të mesme, përfshirë ato të drejtuara nga gra dhe sipërmarrës të rinj, janë duke u goditur më së shumti nga rënia ekonomike e shkaktuar nga pandemia. Masat për të parandaluar përhapjen e koronavirusit, kanë rezultuar në ndërprerje të zinxhirit të furnizimit dhe një rënie masive të kërkesës në shumicën e sektorëve. Për të vazhduar të luajnë rolin e tyre vendimtar në krijimin e vendeve të punës dhe përmirësimin e kushteve të jetesës, bizneset varen më shumë se kurrë nga një mjedis ekonomik favorizues që siguron mbështetjen për qasje në financa, informacion dhe tregje”, ka shkruar ai.

“Dje i kam kërkuar edhe me shkrim kryetares së Kuvendit të Kosovës, Vjosa Osmani, që Kuvendi i Kosovës ta trajtoj me prioritet Projektligjin për plotësim ndryshimin e Buxhetit të Republikës së Kosovës për vitin 2020, si dhe ri-procedimin për ratifikim të marrëveshjeve ndërkombëtare. Duke marrë parasysh pasojat që kjo pandemi po shkakton në ekonomi, aprovimi i Projektligjit të Buxhetit dhe ratifikimi i marrëveshjeve ndërkombëtare do t’i hapte rruga Qeverisë për të ndërmarrë masa të menjëhershme në ndihmë qytetarëve dhe bizneseve, me planin shumë të nevojshëm për rimëkëmbjen ekonomike. Prandaj, me mirëkuptim për situatën e rëndë ekonomike në vend, kërkojë që ky projektligj të trajtohet me prioritet të lartë”, ka përfunduar Hoti.

Ardian H

Read Previous

Judah: Hoti, në raport me Vuçiqin, është xhuxh politik

Read Next

Latifi: Kosova nuk ka qenë në situatë më të rëndë diplomatike, partive po iu intereson vetëm pushteti