KEDS-i akuzon kompaninë që po ndërton rrugën Prishtinë – Gjilan se për herë të katërt po prish kabllot

Kompania që po ndërton rrugën Prishtinë – Gjilan ka prishur sërish kabllon e tensionit 10 kilovolt, duke lënë pa energji një pjesë të konsiderueshme të konsumatorëve në Veternik.

“Kjo prishje është e katërta brenda javës. Prishja i ka lënë pa energji edhe shumë biznese të mëdha”, thuhet në një komunikatë për media dërguar nga KEDS-i.

Sipas komunikatës ekipet e KEDS-it kanë dalë menjëherë në vendin e ngjarjes për ta sanuar atë prishje.

“Kjo pakujdesi e kontraktorit të Qeverisë po shkakton telashe shumë të mëdha në furnizim me energji elektrike në atë pjesë. Madje, po ia pamundëson KEDS-it që të bëjë furnizim normal me energji elektrike. Në atë zonë gjenden edhe shumë biznese të mëdha, të cilat po afektohen direkt”, thuhet në komunikatën e dërguar nga zëdhënësi Viktor Buzhala, përcjell ksp.

Sipas tij kjo situatë është e papranueshme dhe nuk mund të përsëritet më.