Australia zhvendoset 1,8 metra, por askush nuk e… sheh!

Australia po shkon drejt veriut duke u zhvendosur nëpërmjet pllakave tektonike, që do të thotë se koordinatat e hartës së vendit po riorganizohen rreth 1,8 metra në verilindje, njoftuan sot autoritetet.

“Australianët janë në lëvizje dhe të gjithë po shkojnë drejt veriut, edhe pse shumica e banorëve nuk janë duke e kuptuar këtë zhvendosje”, deklaroi Matt Canavan, ministër për Burimet dhe Veriun e Australisë.

Zhvendosja kontinentale në një shkallë prej shtatë centimetra në vit do të thotë se korniza referuese kombëtare e koordinimit të Australisë (Të Dhënat Gjeocentrike të Australisë 2020) duhet të përditësohet, për herë të parë në më shumë se dy dekadash.

“Lëvizja është e rëndësishme kur bëhet fjalë për aplikacione që mbështeten në pozicionimin e saktë satelitor, duke përfshirë atë në bujqësi dhe shërbime të bazuara në vendndodhje dhe operacione të tjera”, tha Canavan.

”Pa rikoordinimin, diferenca mund të shkaktojë një gabim të gjatësisë aq të madh sa mund të shkaktojë probleme për çdo aplikacion që përdor sistemet globale të navigimit satelitor, si GPS-i në smartphone dhe makina. Shkencëtarët kanë vendosur t’i mbështesin koordinatat e reja në pozicionin e parashikuar të kontinentit australian më 1 janar 2020, duke iu shtuar dhe tre vite të tjera të dhënave të reja”, shtoi Cavanan.

Michelle Landry, një deputete australiane, tha se ishte e befasuar kur mësoi se Australia ishte ulur në pllakën kontinentale më të shpejtë në planet.

“Që kur aborigjenët arritën në këtë rajon rreth 50 000 vjet më parë, Australia është zhvendosur rreth tre kilometra e gjysmë”, tha Laundry.

“Në të vërtetë, me shpejtësinë e tanishme, e gjithë Australia do zhvendoset në veri të Tropikut të Bricjapit për rreth 30 milionë vjet, duke ndryshuar krejtësisht gjeografinë e të gjithë rajonit”, tha Landry gjatë një deklarate për shtyp.

Leave a Reply

Your email address will not be published. Required fields are marked *